Nu sünd öber föftig Johr in ´t Land gohn, - un ick hev nu sülvst söss Grootkinner. - Un nu will ick so ´n Großvadder sien,  as ick mi so een as Jung jümmers vörstellt heff.  Man bloß de Tieden sünd nu anners, - un nu will ick wies warden, wat sick mien Grootkinner ünner een´ richdigen Großvadder wol vörstellt. - 
Ick verseuk dat ´mol so.  Een mutt woll in so ´n lütten Kopp oder in so ´n lütt Hart rinlüstern. Dormit se dat ober nich wies ward, müßt du mit jüm speelen.  Wat dat nu Barbie-Poppen,  Rennwogens oder ´n Kron ut Lego-Steen´ is, - köönen muß Du allns, - du muß all´ns op de Reeg kriegen. 
Nich dat du ´n Stimm´n nich nomoken kanns - oder nich wi ´n Ferrari brummen kanns - oder twee Lego-Steen nich ut ´n anner kriegen kanns ? - Nee - denn hest all meist verspeelt.  Ober wenn du di Meuh´geben deist, denn seht se di all mol wat no,  wenn dat Mitspeel´n denn nich so klappen deiht. 
Un denn must du ok noch spendobel sien, - Kaugummis, Coca-Cola, Is an´ Steel un all den Bonschie-Bax-Krom, - dat dörf´s gornich reken.  Wenn se denn noch mehr wöllt, denn bring jüm to ´n snacken - un heur to. -  Wenn Du Glück hest, kümmt dor wat bi röber, wat di wiederhelpen deit.  Man bloß nich twüschensnacken,  ober ernsthaftig blieben un mol Nickköppen is nich verkehrt. - 
Wat se nu fief, tein oder föfftein Johr old sünd,  wenn se sick denn rinkieken lot´ in jümmer lütte Seel´, is dat nix anners, as dat bi di sülvst wesen is.  Du hest dat man bloß vergeten hat,  un warst dat nu ers wedder wies. - 
De Sprook, dat Speeltüg, wi se mit sick ümgoht - un dat ganze Drümrum, - dat is nu anners. Dor kanns du allmol wat beleben, wat di denn Verstand versleigt. Denn kannst du dat ganze Elend sehn, wat düsse 33 Satelitensenders in de lütten Köpp inplanten dot. - 
Ober dat Lachen un dat Weenen, - dat Bang´sien un dat sick opspeelen, - dat Trohartige un dat Muulen, - dat Neeschierige un dat Dankbore, - dat is all nich anners, as in de eegen Kinnertied - un dat is dien Schangs. - 
Mit de lütten Deerns is dat woll ´n beten lichter to.  Dor kanns all so ´n beten  no dat hoffortige gohn,  wat bi Froonslüüd ok ansleit.  Wenn se sick de Hoor mol anners opdreiht hebt segst du :  „Dor sühst Du ober fein mit ut !" un „Dat hett Dien Mudder ober fein hinkregen". -  „Das hab´ ich doch alleine gemacht, - guck ´mal Opa, so - un so - un denn dadurch - un denn isses fertig !"  „Richdig schick" segst Du denn,  un denn hest Du so ´n lütte Seel´ all meist fungen.  Blooß wohr di, - wenn di bi dat nächste mol nix anners infallen deit.  Dat mit de Hoor kanns´ bloß twee- dreemol in ´n Johr moken. - 
So ´n Großvadder, den mutt man jümmers wat Nee´s infallen. Denn  dörf em för de annern bloß nich datsülbige infalln,  denn is he för lange Tied ünnerdörch.- 
Wenn he ober noch ´n poor Kasperpoppen hett, kann he sick fein helpen. Op ´t best mit Hex un Dot un Deubel, ober ok mit ´n grotes Krokodil, wat so ´n ganze Kasperpopp opmol wegsluken deit. Denn kriescht un kreiht se.- Em mööt ober ok jümmers de Geschichten dorto infalln. Wenn he denn achter den ümgekippten Stubendisch in de Huuk oder op Kneen sitten deit,  is dat ok wat för de lütten Jungs.  Dorvon könnt se nich genog kriegen. Dat mit dat Kaspertheoter geiht solangen god, as sien Geschichten spannend sünd un sien Stimm´ sick jümmers noch bi ´n Schandarm - un bi Kasper - un bi sien Marieken verstellen lött. Wenn dat nich mehr is, frogt se meist no ´n Tied, wat du nich ´n Kasperpopp vun Barbie, vun Batman oder Spyderman, vun 007 oder vun Karmet hest.-  Dor helpt denn, dat du vun dat Rumkrupen achter den Disch ´n Ramm in´t Been kriegen deist,.  Denn schuft se di ´n Stohl in de Kneekehlen un du müßt jüm verkloren, wat dat is, - so ´n Ramm in´t  Been. - 
Meisttieds is so ´n Großvadder för so ´n Spiejöök nich to bruken. Denn deit em hier wat weh, - un dor knippt em wat - un he is gnatterig.  - 
Denn is he heelfroh,  wenn de Kinner bi jümmer Öllern, - in de School - oder sünstwo sünd.