Mit twölf  Forellen käm Hannes an düssen Sünnobendmorgen von sienen Angeldiek.  He wär all freuh in ´n Düstern lostrocken un düchdig wat stollt op sienen Fang.  Unvermodens wär Söhn Bernd mit sien Familie to Beseuk dor. Swiegerdochter Alexa güng Hannes glieks an : „Deine Generation kann es wohl nicht lassen in der Natur herumzufreveln. Hättest Du es nicht bei zwei Forellen für Dich und Oma belassen können ?"- Se is eene Greun-Alternative un kann bi sowat denn dat Woter nich hollen.- 
„Eersmol eet ick twee, - un Dien Mann Bernd ok. - Oma een´, - lütt Heike een´, - un de Rest ward infroren.  För Di könnt wi jo ´n beten Heuhnerfudder in warme Melk rin mohlen. Denn krigt hüt bi uns an ´n Disch jedereen dat wat he mag." säh Hannes - un güng vergneugt in de Köök, um siene Fisch torechtomoken. In de Stuv sneuf Berd sien Alexa an, wat se sienen Vadder nich mehr ännern kann, - un Oma Luise schimp op ehren patzigen Hannes. 
De lütt Heike mit ehr acht Johr müch de Quarkeree woll nich - un se mussel sick lies´ no ehren Opa in de Köök. - Hannes wär grod mit dat Slachen vun de Fisch trecht.  De Lütt wär neeschierig, - meuk ober ´n kruse Nees un wull man gornix anfoten.  Se stünn op een´Stohl an Hannes bito un keek em op de Finger.  Hannes verkloor ehr, wat dat allns wär an den Fisch. Un dat dat glitschige op den Buuk nix anners wär as sowat wie dat weeke Kneetgummi,  wat Heike mol ut den Kinnergoorn mitbröcht hett.  Eers tipp se man bloß so mit ´n Finger op den glitschigen Buuk. - Denn kreeg se dat Totroon un wull ehrn Grooßvadder helpen.  Hannes hett ehr ´n lütte Schött umbunnen un de Fisch opsneden, - un de lütt Heike hett richdig mit beide Han´n de Fischbloos, - de Darms - un den Rogen ut den Buuk rutpult.  Dat Bloot is ehr an de Arms bit op dat Kleed loopen.  As Alexa in de Köök käm, hett Bernd dat all rutheurt, dat he hier hüt keene „gebackenen Butterforellen mit gerösteten Mandelsplittern" kreeg. 
De lütt Heike hett weent un wull bi ehr Großöllern blieben. -  Ers as se in so ´ne „Frittensmeed" ´n Tüt mit galsterige Pommes un ´n Cola harr, füng se an to vertelln.  Se verklor ehr Öllern nu,  woso so ´n  Fisch swemmen kann, - wo dat Freten in den Fisch rin - un wo de Schiet wedder rutgeiht. - 
Luise hett dat Eten fein hinkregen un achterher mit ehren groten Fischersmann anstött un eenen „Affsacker" dolkippt. - 
Hannes harr nu negen Fisch to ´n infreern ! - 
De Rest von de Welt kunn sienwegen de Pappfrikadellen bi Macdonalds freten. - 
De beiden hebbt denn twee Stünn´ scheun to Middag slopen. -